Indi mahimo nga madismiss sa serbisyo ang kontrobersyal nga si Police Master Sergeant Federico Macaya Jr.
Ini matapos nga ginpasakaan ini sang kaso bangud sa pagpamahog kag pagguba sang kudal sang iya kasilingan sa Brgy. Sambag, Jaro,Iloilo City.
Ginpasaka sang tagreklamo nga si Pio Roy Conde sa National Police Commission Region 6 ang kaso-administratibo nga misconduct, conduct unbecoming of a police officer, kag oppression kag nagahingyo pa sang preventive suspension batok sa pulis.
Sa interview sang Bombo Radyo kay Atty. Joseph Celis sang National Police Commission Region 6, iya ginpahayag nga simple gid lang kuntani ang nasambit nga problema sa tunga ni Macaya kag Conde kag mahimo na- settle sa lebel sang barangay.
Suno kay Celis, posible nga ginpadako lang sang tagreklamo ang isyu rason nga naglab-ot sa pagpasaka sang kaso batok kay Macaya.
Sa subong suno sa natungdan, ila nalang ginahulat ang pagpasa ni Macaya sang counter affidavit sa iya kaso.
Matandaan nga si Macaya amo ang anay imbestigador sang Guimbal Municipal Police Station nga gindis-armahan, ginposasan, ginsipa, gintampa, ginsapote kag ginduplaan sa nawong ni anay Iloilo 1st district Cong. Richard Garin samtang gintayaan naman ini sang armas sang iya amay nga si Guimbal Mayor Oscar Garin.
Samtang suno naman kay Lt. Col. Joem Malong, tagpamaba sang Police Regional Office 6, indi sila maka-imbestigar sa nasambit nga isyu.
Suno kay Malong, itugyan nalang ini sang Police Regional Office 6 sa National Police Commission kun sa diin ginpasaka ang kaso.
Ginpahayag ni Malong nga hulaton nalang nila ang resolusyon sa kaso kag kun mapamatud-an nga may liabilidad si Macaya, kinahanglan nga atubangon sini ang konsekwensiya sang iya nangin aktwasyon.
