Malipayon kag puno sang paglaum nga nakapauli na sa ila kaugalingon nga puluy-an ang isa ka tawo nga amo ang labing-una nga recipient sang pig kidney transplant.
Ini amo si Rick Slayman, 62, nga ginpaguwa sa Massachusetts General Hospital duha ka semana matapos ang madinalag-on kag maragtason nga operasyon.
Suno pa sa ospital, maayo ang pag-recover ni Slayman kag padayon ini nga magapa-kondisyon sang iya nga lawas samtang ara sa ila nga balay.
Ginsapubliko man sang pasilidad ang statement sang pasyente: “This moment – leaving the hospital today with one of the cleanest bills of health I’ve had in a long time – is one I wished would come for many years. Now, it’s a reality and one of the happiest moments of my life.”
Ang amo nga pasyente ang residente sang Weymouth, Massachusetts, nga na-diagnose anay nga may end-stage kidney disease.
Ang operasyon sa iya amo ang labing-una nga tion nga wala napalpak ang pig kidney transplant sa isa ka buhi nga tawo — isa ka milestone sa patag sang xenotransplantation ukon ang animal-to-human transplant.
Ginsaad sang ospital nga nagpasugot ang pasyente sa amo nga transplant, bangud una, limitado na ang iya nga medical options kag ikaduha, gusto man sini nga makadala sang paglaum sa linibo ka mga pasyente nga posible mabuligan paagi sa sini nga procedure.
Sa pagkamatuod, indi ini ang una nga kidney transplant kay Slayman — sang 2018, nakabaton man siya sang kidney halin sa isa ka tawo bangud sa iya nga diabetes kag high blood pressure. Samtang nagadugay kag nag-lima na ka tuig, ang amo nga kidney ang nagpakita na sang sintomas nga nagahina na ini rason nga nagbalik ang pasyente sa dialysis sang 2023.
Ang kaso ni Slayman amo ang ikatatlo nga xenotransplant kun sa diin gingamit ang organ sang baboy kag ginsaylo sa tawo.
Ang nauna nga duha ka procedure ang naggamit sang korason sang baboy apang pareho nga napatay ang pasyente pila ka semana matapos nga nabaton ang organs.
Nahibaluan nga kada adlaw, 17 ka mga tawo ang nagakapatay sa US samtang nga nagahulat sang organ kun sa diin ang pinakakinahanglanon amo ang kidney. Suno sa Organ Procurement and Transplantation Network, ginabanta 27,000 kidneys ang na-transplant sang 2023, apang malapit 89,000 ang yara sa waitlist para sa amo nga organs.
Ginapatihan naman sang mga eksperto nga ang xenotransplantation ukon transplants halin sa sapat pakadto sa tawo amo ang kritikal nga parte sang pagsolbar sa kakulangan sang donor organs.#
