ILOILO CITY- Gintiro-patay sang isa ka lalaki ang iya kaugalingon samtang naga-live sa facebook sa banwa sang San Rafael, Iloilo.
Ang biktima amo si alyas Toto, 36, residente sang Brgy. Jayubo, Lambunao, Iloilo.
Sa interview sang Bombo Radyo kay Police Corporal Roel Alarcon, Assistant Investigator sang San Rafael Municipal Police Station, iya ginpahayag nga may nabatian ang mga pumuluyo nga lupok kag gilayon nga ginkadtuan ang lugar kag nakit-an ang lalaki nga duguon nga nagakaya sa tupad sang iya motorsiklo.
Suno kay Alarcon, may igo sang bala sa dughan ang lalaki nga gintunaan sang iya kamatayon.
Nakit-an man sa tupad sini ang pusil nga gin-gamit niya sa pagluthang sa iya kaugalingon.
Base naman sa iya live video, may problema sila sang iya asawa.
Nahibaluan nga may lima ka magagmay nga mga kabataan nga ginbilin ang biktima.
