Nakahibalo ka bala nga may tawo nga wala man naga-inom sang makahulubog nga ilimnon, apang daw hubog gihapon bangud sa alcohol nga ara na nga daan sa ila nga lawas?
Tuman ka gamay lamang nga numero ang may amo sini nga kondisyon nga ginatawag nga auto-brewery syndrome (ABS) nga amo ang rason kun ngaa ang carbohydrates sa ila lawas ang nagaagi sa fermentation, nagasaka ang ethanol levels sa ila nga dugo kag naga-resulta sa senyales sang pagkahubog.
Sa Belgium, may isa ka lalaki nga nadakpan sang 2022 nga naga-drive nga hubog paagi sa breathalyser nga equipment sang pulis. Isa ka bulan ang nagligad, nadakpan ini liwat sa amo man gihapon nga kaso apang sulit-sulit ini nga nanindugan nga wala siya nakainom.
Nabukaran man nga sang Abril 2019, una na nga namulthan ang amo nga tawo kag nasuspende pa ang lisensya bangud sa kaangay nga sala.
Ginpasaka sa korte ang kaso kag subong lamang napaguwa ang desisyon.
Base sa desisyon sang huwes, napamatud-an sang 40-anyos nga lalaki nga may yara ini matuod sang auto-brewery syndrome rason nga daw hubog ini pirma.
Halos 20 lamang ka tawo sa bilog nga kalibutan ang may amo sini nga kondisyon gani indi ini pamilyar sa kadam-an.
Tatlo ka mga doktor ang nagpamatuod sa kondisyon sang lalaki kag nangin rason ini kun ngaa na-acquit ang tawo sa iya nga kaso.
Ginpakigbahin man sang lalaki nga ginasunod gid sini ang carbohydrate-light diet agud nga malikawan sini nga mag-produce sang tuman ka damo nga alcohol sa iya nga lawas.#
