ILOILO CITY – Problema sa Brgy. Ortiz, Iloilo City ang madamo nga layaw nga ido.
Sa interview sang Bombo Radyo kay Barangay Kagawad Ma. Teresa Yu, iya ginpahayag nga madamo sang layaw nga ido sa ila lugar sa diin may iban man nga ido nga nagasayo sa ila barangay kag nagatuga sang huol.
Suno kay Yu, isa man sa problema ang tuhoy sa kakulang sang lugar agud nga pahamtangan sang dog pound bangud nga kalabanan sa mga bakante nga lote ang makabig nga privately owned kag coastal area man ang ila barangay.
Sa pihak sini, ginpahayag sang Barangay Kagawad nga kun ipatuman gid ni Iloilo City Mayor Jerry Treñas ang pagpatukod sang dog pound sa tagsa ka barangay, ila nga pangitaan sang paagi agud nga ini ang matigayon.
Samtang, ginpahayag naman ni Yu nga nagpamigado ang mga vendor sa ila lugar humalin sang ginsaylo sa Parola Wharf ang dulungkaan sang mga pump boat nga may biyahe Iloilo-Jordan vice versa.
Suno sa opisyal, makabig nga pigado kag maluya ang pagsaulog sang fiesta sa Nobyembre 27 bangud nga ang iban sa mga vendor kag porter ang nadulaan sang palangabuhi-an.
