Naghimo sang panibag-o nga record si LeBron James matapos ginkilala nga pinakatigulang nga player sa maragtas sang National Basketball Association (NBA) nga naka-skor sang 40-points sa isa lang ka hampang sa liga.
Nahimo ini sang 40-anyos nga Lakers superstar sang naka-poste sang season-high nga 42 points sa 120-112 nga kadalag-an sang Los Angeles batok sa Golden State Warriors.
Disyembre 30, 2024 sang nagtapak sa edad nga 40 si James apang ginalantaw nga madamo pa ini sang mahimo sa iya ika-22 nga season sa NBA.
Lapaw na ang nahimo ni James sa iya idolo nga si Michael Jordan nga amo ang isa nga NBA player nga naka-skor sang 40 points matapos ang iya 40th birthday. Nahimo ini anay ni Jordan sa hampang batok sa Washington Wizards tatlo ka adlaw matapos ang kaadlawan niya sang Pebrero 2003.
Daku man ini nga record sa pangalan ni LeBron bangud siya man ang naga-uyat sang record bilang pinakabata nga player sa NBA history nga naka-skor sang 40 points sa isa ka hampang. Nahimo niya ini sa edad nga 19-anyos sang 2004 sang nag-skor sang 41 points bilang rookie sa Cleveland Cavaliers batok sa New Jersey Nets.
Magluwas diri, ang nasambit nga Lakers great ang naga-uyat man sang 10 ka triple-doubles subong nga season nga nagahimo sa iya bilang ikaduha sa pinakatigulang nga player nga nakalab-ot sang amo nga record kasunod sang na-set ni Karl Malone sang 2003.#
