Ginpahayag sang isa ka legal expert nga wala sang legal conflict sa tunga sang grave threats case nga ginaatubang ni Vice President Sara Duterte sa korte kag sa impeachment case nga iya naman ginaatubang sa Senate impeachment court.
Sa interview sang Bombo Radyo kay Atty. Jeremy Moreno, professor sa University of San Agustin, College of Law, iya ginpahayag nga lain ang sentro sang impeachment case kag grave threats case kun sa diin ang impeachment ang isa ka sui generis ukon espesyal nga proceeding nga nagalantaw kon may mga acts nga nagresulta sa betrayal of public trust, violation of the Constitution, ukon graft and corruption, kag ang pinakamabug-at nga penalty sini amo ang pagpahalin sa opisyal sa iya posisyon.
Samtang, ang grave threats isa ka criminal case nga sandig sa Revised Penal Code kag nagatutok sa criminal liability sang akusado bangod sa ginapahayag nga pagpamahog sa kabuhi sang isa ka tawo.
Suno kay Atty. Moreno, wala man sang double jeopardy bangod ang impeachment proceedings indi criminal proceeding rason bisan ano ang mangin resulta sang impeachment case, indi ini awtomatiko nga magresulta sa pareho nga desisyon sa criminal case.
Ginpunto man niya nga wala sang ‘immunity from suit’ ang Vice President nga kaangay sa proteksyon nga ginahatag sa nagapungko nga Presidente.
Buot silingon, kon may ginakabig nga criminal offense nga gin-commit ang Vice President, mahimo siya mapasakaan sang criminal case bisan ongoing pa ang impeachment proceedings sini.
Pahayag pa sang abogad, posible man nga mag-file ang Department of Justice (DOJ) sang iban pa nga criminal cases nga may kaangtanan sa mga alegasyon nga ginadiskusyonan sa impeachment court, lakip na ang mga alegasyon nga mahimo magresulta sa criminal liability.
Apang, dugang pa niya, yara gihapon sa discretion sang DOJ kon magahulat ini nga matapos anay ang impeachment trial ukon magapadayon sa pag-file sang criminal case, nga amo ang ginatawag nga departmental courtesy.
