JORDAN,GUIMARAS– Plano sang lokal nga pamunuan sang Jordan Guimaras nga hugton ang monitoring sa pagwa kag pagsulod sang mga pumuluyo sa ila banwa.
Sa interview sang Bombo Radyo kay Jordan Mayor Ruben Corpuz, iya ginpahayag nga sa masunod nga mga inadlaw mas hugtan ang ipatuman nga protocol sa pagtabok sang mga pumuluyo sa Iloilo, lakip na ang pagpabalik sa ila banwa.
Suno kay Corpuz, usisaon nila sang maayo kun bala importante ang pagtabok sang isa ka pumuluyo, kag kun ano ang ila rason sa kun ngaa kinahanglan nila nga magpadulong sa syudad sang Iloilo.
Pahayag pa niya, ini agud malimitahan man ang kadamuon sang tawo nga nagagwa kag sulod, agud malikawan nga malaba-ot sa ila banwa ang Coronavirus disease 2019 (COVID-19).
Nagpanugyan man ang alkalde sa mga pumuluyo nga sundon ang mga minimum health protocols nga ginapatuman kaangay sang paggamit sang facemask, pagpanghugas sang kamot, kag magpabilin sa sulod sang balay kun wala sang importante nga kaladtuan.
Samtang, wala sang dapat kabalak-an ang mga pumuluyo sa banwa sang Jordan Guimaras may kaangtanan sa ginapahayag paglab-ot sang oil spill sa ila banwa.
Suno kay Mayor Ruben Corpuz, nakipag-angot na siya sa Coast Guard Station Guimaras kag ginpahayag sang Coast Guard nga wala sang dapat kabalak-an bangud minimal lang ang oil sheens kag spill nga nakalab-ot sa barangay Hoskyn kag Rizal.
Nagpahanda man siya suno sa alkalde sang oil spill booms agud magamit sa tion nga maglala ang sitwasyon.
