Apisar nga ginsiling ni Pope Francis nga daw kaangay nga may Lolo ang isa ka puluy-an sang pareho sila nga nagtinir ni Pope Emeritus Benedict XVI sa Vatican, ginbuyagyag sang libro sang personal secretary sang former pope ang tensyon nga nabatyagan sa gamay nga city-state bangud sa duha ka santo papa.
Huwebes sang ginlubong si Benedict kag si Pope Francis man ang nagpanguna sa misa sa St. Peter’s Square.
Pagkatapos sini, may yara sang Italian publishing house nga naghatag sang advance copies sang 330-ka pahina sang libro nga “Nothing But The Truth – My Life Beside Benedict XVI” nga ginsulat ni Archbishop Georg Ganswein.
Si Ganswein, 66, amo ang personal secretary ni Benedict halin sang 2003 tubtub nga napatay ini.
Nangin gatekeeper man ni Pope Francis si Ganswein apang gin-islan siya sang 2020.
Sa amo nga libro, ginpatpat ni Ganswein ang mga hitabo sa pag-elect kay Benedict bilang santo papa sang 2005, pag-resign sang 2013, ang iya kabuhi bilang pope emeritus, tubtub sa iya pagbalatian kag kamatayon.
Apisar nga wala na halos sang public appearances si Benedict sang nanaog ini sa posisyon, nagpabilin siya nga standard-bearer para sa Catholic conservatives nga ginpahayag daw nagbatyag nga lain sila bangud sa mga pagbag-o nga gin-umpisahan ni Pope Francis lakip na ang crack down sang old Latin Mass.
Suno kay Ganswein, nakibot man si Benedict nga wala nagsabat si Pope Francis sa public letter sang apat ka conservative cardinals sang 2016 lakip na ang halin kay American Cardinal Raymond Leo Burke nga nag-akusar kay Francis sang pagtanum sang confusion sa moral issues.
Sa amo nga libro ginpahayag man nga wala nag-ugyon si Benedict sa pila ka panindugan ni Francis.
Pagkatapos sang long interview ni Francis sa isa ka Jesuit journal anum ka bulan ang nakaligad matapos ang iya nga election, ginpahayag nga nagpadala si Francis sang journal kay Benedict para sa iya nga mga komento.
Ginpahayag ni Ganswein nga gin-critique ni Benedict ang paagi sang pagsabat ni Francis sa questions kaangay sa abortion kag homosexuality.
Suno pa sa libro ni Ganswein,”sala” ang pagkabig sang pope emeritus sa desisyon ni Pope Francis nga i-restrict ang paggamit sang traditionalist Latin Mass.
Wala naman sang komento si Vatican spokesman Matteo Bruni sa amo nga libro nga ginsulat kaupod kay Italian journalist Saverio Gaeta.
‘SERVING TWO MASTERS’
Sa una nga pito ka tuig matapos na-elect bilang santo papa si Pope Francis, duha ang trabaho ni Ganswein – Prefect of the Pontifical Household kag private secretary sa ex-pope.
Suno kay Ganswein, wala siya nakakuha sang “climate of trust” sa bag-o nga santo papa, kag ginpahayag man sini nga posible nga gintugtan lang siya ni Pope Francis nga tungdan sa gihapon ang trabaho bilang prefect bilang respeto na lang kay Benedict.
Enero 2020 sang nangin sentro man sang kontrobersyal nga episode si Ganswein bangud sa libro kaangot sa priestly celibacy nga ginsulat sang conservative nga si Cardinal Robert Sarah. Suno kay Sarah, si Benedict ang co-author — butang nga ginpanginwala ni Benedict kag nagpahayag pa sang amo nga tion nga kakason ang iya pangalan sa cover.
Nabutang sa tunga-tunga si Ganswein kag gilayon siya nga ginkakas ni Pope Francis bilang prefect. Suno pa sa archbishop, ginmanduan siya ni Pope Francis nga indi na magbalik sa iya nga trabaho kag magtutok na lang sa pagbantay sa pope emeritus.
Nagsulat si Benedict kay Francis kag nag-apelar nga maghimo man sang tikang agud nga ma-athag ang sitwasyon bangud ginpahayag nga nagsuprer si Ganswein kag “under attack from all sides”. Wala naman ginbalik ni Francis si Ganswein sa iya daan nga posisyon. ## — via Reuters
