Nalakip ang pangalan sang lider sang Russian mercenary group nga Wagner nga si Yevgeny Prigozhin sa lista sang mga pasahero nga nakasakay sa eroplano nga nagtibusok sa Moscow.
Suno sa reports sang state media sang Russia, may ginlunsar na subong nga imbestigasyon kaangot sa plane crash nga natabo sa Tver region north-east sang Moscow sang Myerkules sang gab-i.
Nagtibusok ang private Embraer Legacy aircraft sang halin ini sa Moscow kag padulong kuntani sa St. Petersburg.
10 ka mga tawo ang sakay lakip ang tatlo ka crew members.
Sandig sa inisyal nga impormasyon, patay ang tanan nga sakay sa eroplano, apang walo pa lang ka bangkay ang na-recover.
Antes sini, nauna na sa pagpaandam ang mga opisyal sang Amerika nga maghalong si Prigozhin bangud posible nga patyon ini sang Kremlin matapos nga nagpanguna ini sa armado nga rebelyon batok sa militar sang Russia sang nagligad nga bulan nga ginkabig pinakadaku nga pagtilaw sa rehimen ni Russian President Vladimir Putin.
Natapos lamang ang amo nga rebelyon sang may deal nga natabo kun sa diin ginpakadto sanday Prighozhin kag ang iya hangaway sa Belarus nga suod man nga kaalyado sang Moscow.
Ang pwersa sang Wagner ang involved sa pagsakop sa mga syudad sang Soledar kag Bakhmut sa Ukraine kasunod sang pag-atake sang Russia sang Pebrero 2022. Pagkatapos sadto, binulan man nga ginpakamalaot ni Prigozhin ang liderato sang militar sa Russia. #
