OTON, ILOILO – Nagapanindugan ang Liga ng mga Barangay President sang banwa sang Oton nga indi personal nga kaakig ukon daan nga kaugot ang rason sang iya pagreklamo sa ginaalegar mahinay nga responde sang Oton Munipal Police Station sa natabo nga Pebrero 26 nga shooting incident sa Barangay Mambog, Oton, Iloilo.
Sa interview sang Bombo Radyo kay Punong Barangay Vanessa Salinas, iya ginpahayag nga wala siya sang daan nga hiligut-anon ukon anuman nga kalain sang buot kay Police Captain Robert Jayson Pancha nga amo ang hepe sang Oton Municipal Police Station.
Suno kay Salinas, sa pagkamatuod, siya mismo ang naga-endorso sa Sangguniang Bayan nga himuan sang commendation kun may accomplishment ang Oton MPS.
Suno kay Salinas, natural lang nga mag-react siya bangud sang amo nga adlaw nga natabo ang pagpangluthang sa barangay hall ukon quarantine facility sang Barangay Mambog kun sa diin patay ang isa ka barangay tanod, kapin isa ka oras ang delay sang pag-abot sang mga pulis.
Ginpahayag pa sang punong barangay nga indi ini ang labing-una nga tion nga ginreklamo ang Oton MPS bangud sa problema sa ila response sa mga crime incidents.
Halin sang natabo ang insidente sang nagligad nga bulan tubtob subong, wala pa nakaistoryahay si Salinas kag si Police Captain Pancha.
Una diri, mismo si Police Regional Office Director PBGen. Rolando Miranda ang nagpahayag nga dapat mag-istoryahanay sanday Salinas kag Pancha agud mag-athaganay sila sa amo nga reklamo.
Ginatinguhaan man gihapon sang Bombo Radyo nga kuhaan sang sabat si Pancha sa ngalan sang patas nga pagwaragwag apang tubtob subong, wala pa sang response nga nabaton.
