Nagutman, nainitan, nagsinggitanay, kag nagkalalipong ang iban nga mga ginikanan kag estudyante nga nagdinaguso sa Iloilo Sports Complex subong nga Sabado para sa una nga adlaw sang tagtaganay sang one-time educational assistance sang Department of Social Welfare and Development (DSWD).
Ang Iloilo Sports Complex amo ang venue para sa taga-Iloilo City kag Iloilo Province.
Bangud sa linibo nga mga tawo nga nag-alalawas na sa venue kag sa tuman ka lawig nga pila, ‘las syete pa lang sang aga, nag-cut off na ang ahensya kag ginpapauli ang iban nga mga tawo kag nagpasalig nga may iban pa man nga adlaw sang tagtaganay sang ayuda. Ginabanta masobra 4,000 ang ginpapauli.
Nagwangal ang mga tawo bangud iban sa ila ang nag-abot sa venue ‘la-una ukon ‘las dos sa kaagahon, apang ginapahayag nga indi organisado ang pagpanagtag sang numero nga rason sang pagdis-uganay.
Pagpatak sang ‘las dose sa udto, sandig sa impormasyon nga nakuha sang Bombo Radyo, yara pa lang sa 500 ka tawo ang naka-pay out.
Sa interview sang Bombo Radyo kay Michelle Boteros sang Malusgod, Pototan nga ‘las tres pa sa aga nag-umpisa sa pagpila, natabo ang pagdis-uganay bangud nag-una ang mga tawo nga bag-o lang nag-abot sangsa mga tawo nga kaagahon pa nag-abot sa venue.
Suno naman kay Gela Jagolingay sang Bagacay, Pototan, may yara pa sang DSWD personnel nga nag-abiso sa ila nga indi lang maghalin sa ila ginatiniran kag punggan pati ang ila nga ilihion.
PAHAYAG SANG DSWD
Ginabanta ‘las nueve sang aga sang nagpa-guwa sang statement ang DSWD nga nagpaathag sang cut-off.
Nag-abiso ang ahensya sa mga tawo nga indi anay magdugok sa venues sang assessment bangud may yara pa man sang schedule sa masunod nga Sabado.
Sa interview sang Bombo Radyo kay Atty. May Castillo, information officer sang DSWD Region 6, iya ginpahayag nga ginpatuman ang cut off para sa “kalinong, katawhay, kag safety sang tanan.”
Ang ginhatag nga masunod nga schedule amo ang Agusto 27, Septyembre 3, Septyembre 10, Septyembre 17, kag Septyembre 24.
Mahimo man suno kay Castillo nga mag-email na sang dokumento agud ma-schedule na nga daan antes pa man magkadto sa venue. Ginaplano sang DSWD nga mag-come up sang QR code.
Bangud man sang natabo, ginaplano na suno kay Castillo nga magbutang sang satellite assessment and payout venues agud nga indi na mabudlayan ang mga tawo.
‘WALA SANG KOORDINASYON’
Nagpahayag naman si Iloilo City Mayor Jerry Trenas nga wala sang bisan ano nga koordinasyon nga ginhimo ang DSWD sa local government unit.
Suno sa alkalde, plano niya nga i-deklarar nga persona non grata sa Iloilo City si DSWD OIC Regional Director Delia Bagolcol.
Gintawag sini nga “stupid” ang plano kag ang execution sa event. Una naman nga ginpahayag sang alkalde nga KUN may estudyante nga mahalitan, mapasaka siya sang criminal and administrative cases sa mga responsable. ##
