Ginkadlawan lamang ni First Lady Liza Araneta Marcos ang mga espekulasyon nga may plano man ini nga magsulod sa pulitika.
Gindepensahan man sini ang iya mga proyekto nga amo ang ginasiling sang iban nga tawo nga ginagamit niya para sa iya plano nga magpadalagan sa pagka-senador.
Suno sa first lady, ang iya nga Lab for All program — ukon ang outreach medical exam para sa pigado nga mga tawo – ang nagsugod bangud may ekstra siya nga tyempo antes umpisahan ang iya klase sa West Visayas State University sa Iloilo City.
Pahayag pa sini, indi na bag-o para sa iya nga mangin sentro sang espekulasyon sa plano sa pulitika ilabi na sang local political pa lamang ang iya bana nga si President Ferdinand Marcos Jr. sa Ilocos Norte.
Dugang sang first lady, wala siya sang interes nga magpadalagan sa anuman nga posisyon sa gobyerno, kag ginsilingan pa sini ang iya nga longtime detractors nga palawigon man gamay ang ila paminsaron.
Gin-ako man sini nga indi siya registered voter tubtub sang 2022 sang nagpadalagan na ang iya bana para sa pagka-presidente.
