ILOILO CITY- Ginkumpirma sang Department of Health (DOH-6) nga may yara sang low-level community transmission sang coronavirus disease (COVID-19) sa Western Visayas.
Sa interview sang Bombo Radyo kay Dr. Jessie Glen Alonsabe, regional chief epidemiologist kag COVID-19 spokesperson sang DOH-6, ini nga low-level community transmission ang natabo sa St. Paul’s Hospital in Iloilo sa diin 11 ang kumpirmado nga kaso nga ginalakipan sang siyam ka doktor, isa ka nurse, kag isa ka staff.
Suno kay Alonsabe, makabig man nga low-level community transmission man ang natabo sa Alimodian sa diin gin-infect sang isa ka health worker ang pito ka miembro sang iya pamilya matapos naggwa ini sa quarantine facility apisar wala pa naggwa ang iya test result.
Pahayag pa ni Alonsabe, ang nasambit nga community transmissions ang makabig nga isolated kag natabo lang sa mga clustered areas sa rehiyon.
Dugang sang natungdan, nagapabilin naman nga mayorya sang kumpirmado nga kaso sang COVID-19 sa rehiyon amo ang mga Locally Stranded Individuals kag repatriated Overseas Filipino Workers (OFWs).
Nagpanugyan naman si Alonsabe nga sa pihak sang manubo nga lebel sang community transmission,kinahanglan nga maghalong sa gihapon kag sundon ang mga safety protocols.
May kaangtanan sa low-level community transmission nga narecord sa syudad, ginpahayag ni Iloilo City Mayor Jerry Treñas nga kinahanglan sa gihapon nga mangin hugot ang pagpatuman sang mga protocol sa syudad ilabi na sa mga lugar nga masami ginadagsa sang madamo nga tawo.
