Ginkumpirma sang state weather bureau nga nag-develop na sa Tropical Depression ang low pressure area (LPA) nga yara sa west sang Babuyan Group of Islands.
Suno sa bureau, nahimo ini nga bagyo alas dos kaina sang kaagahon kag pagatawgon sa Pilipinas bilang si Bagyo Bising.
Sa 5:00 am bulletin, ginsiling nga nahamtang ang bagyo 200 kilometers west northwest sang Calayan, Cagayan kag nagahulag southwestward sa kadasigon nga 20 km/h.
Dala sini ang maximum sustained winds nga 45 km/h malapit sa sentro kag pagmadlos nga tubtub sa 55 km/h.
Napasaka naman sa Signal Number 1 ang pila ka areas sa Luzon lakip ang western portion sang Babuyan Islands (Calayan Island and Dalupiri Island) kag ang northwestern portion sang Ilocos Norte (Pagudpud, Bangui, Burgos, Pasuquin, Dumalneg).
Si Bising amo ang ikaduha nga tropical cyclone nga nagsulod sa Philippine Area of Responsibility (PAR) subong nga tuig.
Base sa Philippine Atmospheric, Geophysical and Astronomical Services Administration, duha tubtub sa tatlo ka bagyo ang maeksperyensyahan sa Pilipinas antes magtakop ang bulan sang Hulyo.
