Duha gid lamang ka official state delegations — halin sa Italy kag Germany — ang magatambong sa funeral ni Pope Emeritus Benedict XVI.
Sa Germany ginbun-ag si Benedict (formerly Cardinal Joseph Ratzinger), kag nagpuyo siya sa Italya sa masobra 40 ka tuig.
Suno sa Holy See Press Office, magapadala ang duha ka pungsod sang official representatives sa lubong sang anay Santo Papa sa Huwebes.
Antes sini, lunsay na nagkadto sanday Italian President Sergio Mattarella kag Italian Prime Minister Geogia Meloni sa haya sang pope emeritus sa St. Peter’s Basilica kun sa diin magapabilin ang bangkay tubtub sa Enero 4.
Samtang yara didto, nagpabutyag sang simpatiya si Meloni sa longtime personal secretary ni Benedict nga si Archbishop Georg Gänswein.
Suno naman sa news magazine nga Der Spiegel, lauman nga magatambong si German President Frank-Walter Steinmeier sa funeral sa Huwebes “in an official capacity.”
Antes sini nga kumpirmasyon nagikan sa Vatican, madamo sang mga kwestyon kun ano ang matabo kun mapatay ang pope emeritus.
Ini bangud plastado ang rituals pananglitan mapatay ang reigning pope, apang lain naman ang sitwasyon kun isa ka former pope ang mapatay.
Lakip sa mga ginkwesyon amo ang suksukon ni Benedict (kun papal dress ukon ang iya sang cardinal) kag amo man ang mga tawo nga magasunod sa funeral bangud indi naman si Benedict XVI ang head of state.
Lakip naman sa inisyal nga mga sabat amo nga ilubong ang pope emeritus nga may features nga reserved para sa pope apang indi tanan. Halimbawa, ang red shoes nga ginsuksok ni Benedict bilang santo papa ang gin-islan sang itom.
Sa official delegations, duha lamang ang imbitado; apang mahimo makatambong ang sin-o man nga public figure apang sa personal capacity lamang.
Sang 2005, 159 ka delegations ang nagtambong sa lubong ni Pope John Paul II, 157 cardinals, 700 archbishops, kag masobra 6,000 ka journalists, photographers, kag iban pa nga media personnel.
Ang funeral sang reigning pope ang ginatambungan sang madamo nga cardinals nga nagakadto sa Roma agud mag-attend sa conclave ukon ang eleksyon sang bag-o nga santo papa.
Sa subong, indi kumpirmado kun pila ka mga cardinal ang magatambong sa lubong ni Benedict bangud wala man sang conclave nga matabo. ##
