Gindeklarar sang Armed Forces of the Philippines (AFP) kag United States Armed Forces nga madinalag-on ang ila nga Balikatan maritime strike exercise sa Laoag City, Ilocos Norte matapos napalugdang sini ang isa ka mock enemy ship.
“Made in China” ang nasambit nga barko ukon ang BRP Lake Caliraya nga naglugdang eksakto 10:49 a.m. ukon duha ka oras matapos nga ginsuguran ang exercise.
Gin-donar ini sang Philippine National Oil Company sa Philippine Navy sang 2014 kag na-decommission sang 2020.
Sa maritime strike naman, gin-representar sang amo nga barko ang isa ka pangontra nga nagatuyo magsulod sa teritoryo sang Pilipinas samtang misyon naman sang militar nga punggan ini na makadungka sa duta nga sakop sang pungsod.
Naggamit ang US kag Philippine military sang naval, aerial kag ground assets agud nga i-target ang mock enemy vessel nga nahamtang sa 8.5 nautical miles ukon 15 kilometros halin sa baybayon sang Laoag City.
Gamit ang Spike missile, ang una nga nag-shoot sa target amo ang fast attack interdiction craft sang Philippine Navy kag ginsundan sang BRP Jose Rizal nga may yara naman sang SSM-700K C-Star anti-ship missile.
Sunod nga gingamit ang Philippine Air Force sang FA-50 lead-in trainer fighter aircraft para maghulog sang air-to-ground missiles sa BRP Lake Caliraya, samtang ginpasagunsunan ini sang F-16 aircraft sang US nga naggamit naman sang guided bomb unit kag direkta nga nag-igu sa target.
Nagpalupad man ang US Lockheed AC-130 aircraft sang 105 mm cannons sa barko, amo man ang ATMOS 155 mm howitzer sang Philippine Army.
Nangin factor man sang delay sa exercise ang isa ka manugpangisda nga malapit sa operational area apang ginsigurado suno sa militar nga safe ang ila ginhimo.
Ini nga sinking exercise ang ginsaksihan sang observers halin sa 14 ka mga nasyon.
Ini ang kabahin sang edisyon sang Balikatan nga amo ang pinakadaku nga military exercise sang US kag Pilipinas halin sang 1991. Opisyal ini nga magatakop sa Byernes nga adlaw.#
