Nagpaguwa na sang show cause order ang Department of Education (DepEd) sa isa ka manunudlo nga amo ang nakit-an sa naglapta nga video nga nagapangakig sa iya nga mga estudyante kag naggamit sang masakit nga mga tinaga.
Suno kay DepEd Assistant Secretary Francis Bringas, may 72-oras ang amo nga teacher (halin sang nagguwa ang show cause order) agud nga maghatag sang paathag kaangot sa insidente.
Ginkumpirma man sang ahensya nga isa ka public school teacher sa Manila ang natungdan apang wala na ginpangalanan.
Base sa inisyal nga imbestigasyon sang DepEd, may grupo sang estudyante nga may ginhambal nga “personal nga isyu” sa maestra nga rason nga ginkadismaya sini kag ginkaakig.
Indi pa matumod kun natabo gid mismo ang pagpangakig sang maestra sa sulod sang classroom bangud nga ang video nga nagalapta ang nagapakita lamang sang nawong sini samtang nagapangakig.
Duha ka minutos kag onse segundos ang ginlawig sang video kun sa diin pila sa gingamit sini nga tinaga amo ang: “ugaling iskwater,” “ingrato”, “walang mararating sa buhay”, kag “wala kayong lugar sa mundo”.
Na-mensyonar man sini sa video nga wala siya nakapasar sa Board Exams para lamang bastuson sang iya mga estudyante nga “wala pa man sang napamatud-an sa kabuhi.”
Suno naman sa DepEd, ang ila nga regional office ang magauyat sang imbestigasyon kun makasabat na ang maestra. Ginpasalig man nga maga-agi ini sa due process.
Sang 2012, matandaan nga may ginpaguwa ang ahensya nga child protection policy kun sa diin nakasaad nga isa ka sahi sang child abuse ang ano man nga akto ukon tinaga nga naga-“debase, degrade, ukon demean” sa “intrinsic worth and dignity” sang bata.
Ginpaathag man sang DepEd nga indi pwede maka-live ang teacher sa social media platforms sandig sa nakasaad sa DepEd Order Number 49 ukon ang Professionalism in the Implementation and Delivery of Basic Education Programs and Services.
Magapakig-angot man ang ahensya sa mga estudyante sang amo nga teacher agud nga magpatigayon sang psycho-social intervention.#
