Pilason ang isa ka mag-asawa sa matapos nga ginlambatan kag ginbuno sang gunting sang duha ka hubog sa Bgry. Tupol Oeste, Cabatuan, Iloilo.
Ang mga biktima ginkilala nga si Anthony Altomia, 35 anyos kag iya asawa nga si Ronalyn Altomia, 33 anyos residente sang Brgy. Inabasan, Cabatuan Iloilo.
Sa interview sang Bombo Radyo kay Alyas Maximo, amay sang biktima iya ginpahayag nga pauli na kun tani ang mag-asawa nagikan sa fiesta sakay sang ila tricycle sang ginlambatan sila sang mag-utod nga hubog.
Ang mga suspek ginkilala nga sanday Roy Pueyo kag ang iya manghod nga wala pa makilalan-an.
Suno kay Alyas Maximo, gintripingan lang ang mag-asawa bangud wala man sang hiligut-anon ukon problema sa tunga sang suspek kag sang mga biktima nga magparyentehanay man lang.
Nag agom sang pilas sa iya nga nawala nga nawong, sa dalom sang iya mata kag natuo nga baba si Altomia samtang nag agom naman sang pilas sa nagkalain-lain nga bahin sang iya lawas ang iya nga asawa.
Nagtuga naman sang kakugmat sa mga kabataan sang mag-asawa nga nakasaksi sa natabo nga aksidente sa ila mga ginikanan.
