Posible matabo ang “Big One” earthquakes nga magnitude 7.9 tubtub sa magnitude 8.2 bisan sa guwa sang Metro Manila.
Ini ang ginpahayag ni Philippine Institute of Volcanology and Seismology (PHIVOLCS) Director Dr. Teresito Bacolcol samtang nga padayon ang preparasyon pananglitan magtay-og na ang “Big One” sa National Capital Region (NCR).
Suno kay Bacolcol, ang Philippine Fault sa Nueva Ecija ang mahimo maka-generate sang magnitude 7.9 nga linog kag posible magtuga sang tsunami waves nga tubtub sa 9-10 metros.
Dugang sini, mahimo man makatuga sang magnitude 8.2 nga linog ang 400-kilometros nga Negros Trench.
Pahayag sang director, ginatutukan ang pagpanghanda sa Manila bangud amo ini ang economic hub ukon political seat sang gobyerno, apang indi dapat pagkalimtan nga mahimo matabo amo sini nga kalamidad sa iban nga parte sang pungsod.
“The world doesn’t revolve around West Valley Fault and marami pang bigger ones in other parts of the country, huwag nating kalimutan. That’s the reason why everybody should prepare… Lahat ng mga Filipinos should prepare kasi hindi lang sa Metro Manila pwede magkaroon ng malaking lindol,” pahayag sini.
Suno naman kay Department of Science and Technology (DOST) Secretary Renato Solidum Jr., bisan pa nga nakasentro ang preparasyon nila kag sang Phivolcs sa Metro Manila, padayon man nga ginatun-an kag ginahandaan ang iban nga parte sa Pilipinas.
Lakip sa preparasyon suno sa iya amo ang simultaneous earthquake drills nga ginahimo sa bilog nga pungsod.
“Nationally, the biggest impact would be if there is a movement in West Valley Fault. The exposure is so high in Metro Manila, that’s why we started looking in Manila in 2002 to 2004. In reality, we have studied many cities in the Philippines, we have prepared maps. In fact, we have different scenarios all over the country,” suno sa tiglikom.
Matandaan nga nag-anunsyo ang Japan kag ang Pilipinas nga irepaso ang “Big One” disaster plans sa 2026 agud malantaw kun may himuon nga mga pagbag-o.
Ang ginahandaan nga “Big One” sa Metro Manila ang ginapanan-aw nga magadangat sa magnitude 7.2 ukon mas mabaskog pa nga mangin resulta kun maghulag ang West Valley Fault.
