ILOILO CITY- Nagapabilin nga at-large ang mag-utod nga suspek sa paglabo sa mag- utod sa Barangay Walang,Lambunao, Iloilo nga nagresulta sa kamatayon sang isa.
Ang napatay amo si Feliciano Macawile Jr., 26 anyos samtang pilason ang manghud nga si Jimboy Macawile 22 anyos, mga manoglibod sang isda kag lunsay mga residente sang Barangay Walang,Lambunao.
Ang mga suspek naman amo sanday Reggie Ferrarez, 29 anyos kag Melvic Ferrarez,25 anyos kag nagalibod man sang isda kag lunsay man mga residente sang nasambit nga lugar.
Sa interview sang Bombo Radyo kay Police Staff Sergeant Jesse Fusin,imbestigador sang Lambunao Municipal Police Station, iya ginpahayag nga base sa imbestigasyon, antes ang krimen, naglabay sa balay ni Feliciano si Reggie Ferarrez matapos magbakal sang ilimnon sa tyangge kag nagpanghangkat ini sang inaway kun sa diin naggwa man ang mag utod nga Macawile kag nakit-an si Reggie.
Suno kay Fusin, may dala nga bato kag punta sang kawayan ang mag-utod nga Macawile kag didto na nag- umpisa ang lampusanay kag haboyanay sang bato kun sa diin nag-abot man si Melvic Ferrarez samtang nagdalagan naman pauli si Reggie agud magkuha sang binangon kag nagbalik kag didto na ginpanglabo ang mag- utod nga Macawile.
Nakaangkon sang pilas si Jimboy sa ulo,wala nga talinga,dughan, kamot kag tiil apang si Feliciano naman ang naigo sa liog nga gintunaan sang iya kamatayon.
Gilayon nga nagpalagyo ang mag utod nga suspek matapos ang krimen.
