Malacañang, indi pa paghingyuon ang bulig ni Torre agud madakpan si Bato

Indi pa pagpangayuon sang Malacañang ang bulig ni former Philippine National Police (PNP) Chief General Nicolas Torre III sa pagpangita kag pag-aresto kay Senator Ronald “Bato” Dela Rosa.

Suno kay Palace Press Officer Claire Castro, wala pa nakamandu si President Ferdinand Marcos Jr. nga mag-tap sang dugang nga mga personnel agud nga maghatag sang assistance sa law enforcement agencies.

Sa subong suno kay Castro, bastante ang pwersa sang PNP-Criminal Investigation and Detection Group kag National Bureau of Investigation (NBI).

Ginapanawagan man sang Palasyo sa tanan nga mga Pilipino nga mag-report gilayon sa awtoridad kun may makit-an sila nga pugante sa ila areas.

Gin-tag naman sang Department of Justice si Dela Rosa bilang “fugitive from justice” kag ginakabig man sang NBI nga “armed and dangerous.”

Sang si Torre ang director sang pulis sa Davao Region, ginpangunahan sini ang operasyon agud madakpan si Apollo Quiboloy, ang founder sang Kingdom of Jesus Christ nga wanted bangud sa qualified human trafficking kag sexual abuse.

Sang nagpungko naman siya bilang director sang CIDG, siya man ang nagdakop kay former President Rodrigo Duterte sang Marso 2025 antes ini gindala sa The Hague sa kaso nga crimes against humanity.

Nagapungko subong si Torre bilang Metropolitan Manila Development Authority (MMDA) General Manager.

Sang ginpamangkot ini kun handa siya nga magbulig pananglitan i-tap siya sang Malacañang, palahog man nga nagsabat si Torre nga makadakop man siya kun yara halimbawa si Bato sa mga dalan, sa canal, ukon sa iban pa nga MMDA areas.#