ILOILO CITY – Nasugudan na sang pamunuan sang Gegato Abecia Funeral Homes sa Brgy. Balabago, Jaro Iloilo City ang pagpakay-o sang ila nga exhaust.
Ini matapos nga may nagpalab-ot sang reklamo sa Bombo Radyo nga isa ka pumuluyo sa nasambit nga lugar may kaangtanan sa ginapahayag malain nga baho nga nagagwa sa exhaust sang punerarya.
Sa interview sang Bombo Radyo kay Alyas Jen, residente sang nasambit nga lugar iya ginpahayag nga indi na nila ma agwantahan ang baho nga naggwa sa punerarya nga daw kaangay sang ginasunog nga plastic kag goma bangud masakit man ini sa ila nga ilong kag tutunlan.
Suno kay Jen, madamo naman sang mga nagmalasakit sa ila nga lugar lakip na ang iya nga bata nga may hapo bangud sa aso nga naggwa gikan sa punerarya kag naga lapta sa ila nga barangay.
Samtang, nagdepensa naman ang tag-iya sang nasambit nga punerarya sa mga alegasyon sang mga pumuluyo.
Sa interview sang Bombo Radyo kay Fely Abecia, tag-iya sang Gegato Abecia Funeral Homes, iya ginpahayag nga indi matuod nga may baho nga naggwa sa ila nga punerarya.
Suno kay Abecia, aprubado man sang Department of Environment and Natural Resources kag iban pa nga ahensya ang iya nga punerarya.
Dugang sang natungdan, posible nga rason kun ngaa nakapanimaho sang sunog nga plastic kag goma ang mga pumuluyo ini bangud sa ginaputos sang plastic ang mga bangkay nga napatay bangud sa COVID-19 agud malikawan ang kontaminasyon base man sa ginhatag nga pagsulundan sang Departmernt of Health.
Nagpangabay man si Abecia nga untatan na kun tani ang pagpalapta sang indi matuod nga impormasyon bangud nagaka-apektuhan ang imahe sang ila nga punerarya.
Sa subong suno kay Abecia, ginasugudan na ang pagpataas sang exhaust sang punerarya agud indi na maglapta pa ang aso gikan sa ila nga crematorium kun may yara gid man.
Sa pagkamatuod suno sa natungdan, may yara sila sang manug abot nga makina sa diin mangin underground na ang exhaust nila agud indi na maggwa pa ang aso.
Apang gin-athag ni Abecia nga lauman nga madugayan pa ini bangud man sa ginapatuman nga Enhanced Community Quarantine bangud sa kahangawa sa COVID-19.
