ILOILO CITY – Ginlunsyar na sang Criminal Investigation and Detection Group ang manhunt operation para kay former Bureau of Corrections chief Gerald Bantag kag former deputy officer nga si Ricardo Zulueta may kaangtanan sa pagpatay sa journalist nga si Percival “Percy Lapid” Mabasa kag inmate nga si Jun Villamor.
Ini matapos nga nagpagwa na sang warrant of arrest ang Muntinlupa Regional Trial Court Branch 206 batuk kay Bantag kag sa iya deputy nga si Zulueta sang Abril 12.
Ginmandu na ni Criminal Investigation and Detection Group director PBGen. Romeo Caramat Jr. ang pagtukod sang tracker teams nga magatutok sa case build-up kag operational research agud nga matumod ang nahamtangan sang mga akusado.
Sang Huwebes, gintuyo sang kapulisan nga iserbe ang arrest warrant kay Bantag sa iya balay sa Caloocan apang wala siya didto.
Nahibaluan nga sang Marso, gin-indict sang Justice Department prosecutors sanday Bantag kag Zulueta parasa 2 counts sang murder.
Sila ang gin-angut sa kamatayon ni Lapid kag sa gina-alegar middleman nga si Villamor bilang principals by inducement ukon ang naghatag sang kwarta ukon reward para sa baylo nga paghimo sang krimen.
Si Lapid ang gintiro malapit sa iya balay sang nagligad nga Oktubre kasunod sang komentaryo online nga nagagwa nga naga-link kay Bantag sa kurapsiyon.
Una na nga ginpanginwala ni Bantag ang iya kahilabtanan sa anuman nga kurapsyon ukon sa iya papel sa krimen.
