Liwat nga igatiglawas ni Manny Pacquiao ang Pilipinas — indi sa boxing ring — kundi sa survival competition show sang Netflix nga “Physical: Asia” nga spinoff sang hit Korean reality series nga “Physical: 100.”
Ini amo ang ikatatlo nga season kun sa diin may 100 ka magapaindis-indis nga atleta, bodybuilders, celebrities, kag madamo nga iban pa.
Diri nga kumpetisyon mapamatud-an ang ila kusog, balance, agility, endurance, willpower, kag strategy. Ang magadaog amo ang tagpalasakop nga may ideal human physique.
Sang 2023 kag 2024 gin-ere ang nauna nga duha ka seasons sini kun sa diin ang nadeklarar nga winners amo ang anay snowboarder kag CrossFit athlete nga si Woo Jin-yong kag CrossFit YouTuber nga si Amotti.
Gin-share man sang platform ang Filipino boxing legend kag iya asawa nga si Jinkee nga nag-abot na sa airport sa South Korea.
“Raise your ‘southpaw’ in greeting! Boxing legend Manny Pacquiao is joining Netflix’s intense competition reality series, Physical: Asia,” kabahin sang gin-post sang Netflix sa TikTok video sang nag-abot na ang people’s champ sa Incheon International Airport.
Si Pacquiao amo ang ginakabig nga “Pambansang Kamao” (national fist) kag ginakabig man nga isa sa legendary athletes sa Pilipinas.
Siya ang isahanon nga boksidor nga nangin eight-division world champion kag siya man ang oldest welterweight world champion sa edad nga 40 anyos. Pormal siya nga nag-retiro sa boksing sang 2021.
