Nag-apelar si Sagip party-list Rep. Paolo Henry Marcoleta sa iya mga kaupdanan sa Kamara nga indi magboto pabor sa pagpahalin kay Kiko Barzaga sa posisyon bilang Cavite 4th District Representative.
Sa iya manifestation sa lower chamber, ginkwestyon man ni Marcoleta kun naigu bala ang iban nga kongresista sang gintawag ni Barzaga nga “crocodile farm” ang Kamara.
“Hindi naman lahat ng House members ay maituturing na buwaya. Mayroon pa din naman na matitino. When I see Cong. Nonoy Defensor, I don’t picture him as a buwaya,” suno kay Marcoleta nga nagatumod kay House Senior Deputy Majority Leader kag Iloilo Third District Rep. Lorenz Defensor.
Ginlawag man sini ang iban nga kongresista nga indi buwaya suno sa iya kaangay kanday Rep. Isidro Ungab sang Davao City.
“‘Pag narinig mo ang salitang buwaya at affected ka, malamang sa malamang, isa ka ngang buwaya. So, I humbly appeal to my colleagues, kung ikaw ay hindi buwaya at sa tingin mo ay hindi ka buwaya, I urge you to vote NO on the expulsion of Cong. Meow Barzaga,” suno kay Marcoleta sa iya nga manifestation.
Nagdangat sa 265 ang ka mga kongresista ang nagboto-pabor sa pag-expel kay Barzaga kagab-i; 14 ang nagpamalabag; kag walo ang nag-abstain.
“The Committee considers that another penalty of suspension will not likely deter the improper behavior, which continuously reflects negatively on the image of the House of Representatives,” suno sa committee report sang Ethics Committee nga gin-sponsor ni 4PS Party-list Rep. JC M. Abalos .
“After deliberation on the case, the Committee found Rep. Francisco ‘Kiko’ A. Barzaga of the Fourth District of Cavite to have committed disorderly behavior and conduct unbecoming of a Member of the House of Representatives.”
Antes sini nga desisyon sang Kamara, duha ka beses na nga nadagdagan si Barzaga sang 60 ka adlaw nga suspensyon.
Nakaserbe anay si Barzaga bilang House assistant majority leader sa 20th Congress antes siya nangin vocal critic ni President Bongbong Marcos kag anay House Speaker Martin Romualdez.
Nag-resign siya sa National Unity Party sang September 2025 matapos na-link sa alleged plot agud nga kakason si Romualdez. Myembro subong si Barzaga sang Partido ng Demokratiko Pilipino (PDP) nga partido ni former president Rodrigo Duterte.
Ini nga 27-anyos nga kongresista ang nakaduso man sang anum ka mga hagna sa iya 11 ka bulan nga pagtinir sa Kongreso lakip na ang proposal nga himuon nga legal ang divorce sa Pilipinas. Nangin co-author man siya sang lima ka iban pa nga bills sandig sa iya nga congressional profile.#
