Gin-certify ni President Ferdinand Marcos Jr. nga “urgent” ang pagpasar sang ginaduso nga kontrobersyal nga Maharlika Investment Fund bill sa Senado.
Sa plenary session sa Senado, ginbasa ang sulat sang presidente kay Senate President Juan Miguel Zubiri sang Mayo 22 kun sa diin nakasaad nga ginapadasig ang pagpasar sa Senate Bill 2020 nga amo ang maga-establisar sang Maharlika Investment Fund.
Suno sa presidente, kinahanglan ang sustainable national investment fund agud nga mapadasig ang pagpatuman sang strategic kag high-impact kag dalagku nga mga proyekto sa imprastraktura nga amo ang mangin dalan sa maayo nga mga aktibidad sa ekonomiya kag pag-umwad sang pungsod.
Gin-cite pa ni Marcos nga kinahanglan ang major infrastructure projects agud nga mabatak ang ekonomiya sa tunga sang inflation, indi estable nga presyo sang produktong-petrolyo nga resulta sang Ukraine-Russia conflict, kag ang padayon nga saka sang interest rates sa pangkalibutanon nga financial sector.
Kun may yara sang sertipikasyon halin sa presidente nga urgent ang isa ka hagna, buot silingon, mahimo mapasar sang Kamara ukon Senado ang hagna sa final reading sa isa lamang ka adlaw.
Sang Disyembre sang nagligad nga tuig, matandaan nga gin-certify man ni Marcos nga urgent ang pagpasar sang kaangay man nga hagna sa Kamara rason nga naaprubahan ini sa third and final reading sa kaangay lang nga adlaw.
Una na nga ginpahayag ni Zubiri nga target sang Senado nga mapasar ang amo nga hagna sa masunod nga semana antes ang duha ka bulan nga break sang Kongreso.
Kun maaprubahan na ini nga hagna sa Senado, kinahanglan pa ang approval sang bicameral conference committee kag ang ratification sang Kamara kag Senado. #
