Isa sa nag-angkon sang matunog nga palakpak sa State of the Nation Address (SONA) ni President Ferdinand “Bongbong” Marcos Jr. amo ang panawagan sini nga nga untaton na ang pagpasa sang systems loss charges sa mga konsumidor.
Suno sa presidente, indi sala sang mga konsumidor ang pagkadula sang elektrisidad bangud sang technical losses ukon pagpangawat sang kuryente, gani indi man husto nga sila pa ang magbayad sini.
“At kung pagbawas ng presyo ang usapan, sa aking palagay, panahon na para tanggalin na ang systems loss na ipinapasa sa consumer,” suno kay Marcos nga rason sang paghugyaw sang mga mamalidha.
Dugang sini: “Hindi naman kasalanan ng consumer kung bakit nagkaroon ng systems loss. Kaya hindi naman tama na sila pa ang pagbabayarin dito.”
Gin-demand man sini ang madasig nga pag-amendar sang Electric Power Industry Reform Act (EPIRA).
Ang EPIRA ukon ang Republic Act 9136 nga ginpatuman sang 2001 amo ang layi nga nagbag-o kag nag-privatize sang industriya sang kuryente sa pungsod. Tuyo sini nga ma-promote ang kompetisyon, makaganyat sang pribado nga investments, kag mapauswag ang generation, transmission, kag distribution sang kuryente.
Sa idalom sang EPIRA, ginatugutan ang mga distribution utilities nga ipasa sa mga konsumidor ang kabahin sang systems loss ukon kuryente nga nadula bangud sang technical losses kag pagpangawat sang kuryente. Ini makita sa binulan nga balayran sang kuryente bilang systems loss charge.
“Therefore, we, the people, request—no, we demand—for the immediate amendment of the EPIRA and to prohibit charging systems loss against consumers, including the value added tax thereon,” suno pa sa president.#
