Ginpasalig ni President Ferdinand ”Bongbong” Marcos, Jr. nga dal-on pauli sa Pilipinas si anay Negros Oriental Representative Arnolfo “Arnie” Teves Jr. kag pasabton sang mga akusasyon batok sa iya lakip ang gina-alegar pagmandu sini nga patyon si anay Negros Oriental Governor Roel Degamo.
Suno sa presidente, wala sang palampuwason ang gobyerno agud nga makuha ang hustisya sa sini nga kaso.
Nagpasalamat man si Marcos sa tikang sang law enforcement agencies kag sang international partners agud matigayon ang madinalag-an nga pag-aresto kay Teves samtang nagahampang ini sang golf sa Dili nga kapital nga syudad sa Timor Leste.
Napaidalom ini subong sa kustodiya sang kapulisan sa amo nga pungsod apang ginpahanugutan ni Timor-Leste President Jose Ramos-Horta ang team sang National Bureau of Investigation (NBI) nga maka-istorya sa amo nga anay kongresista samtang yara ini sa detention facility.
Mismo si NBI Director Medardo de Lemos ang nagpanguna sa team sang Pilipinas kag amo ang maga-koordinar sa East Timor agud madala-pauli si Teves.
Sa inisyal nga pahayag sang NBI public information office chief nga si Nick Suarez, kun makaabot na si Teves sa Pilipinas, ipaidalom ini sa kustodiya sang Department of Justice (DOJ).
Sang Pebrero sini lang nga tuig, matandaan nga nabutang ang pangalan ni Teves sa red notice sang International Criminal Police Organization ukon Interpol.
Magluwas sa kaso nga murder, frustrated murder, kag attempted murder nga ginpangatubang sini bangud sa Degamo massacre, napasakaan man ini sang kaso bangud sa pagpatay sa tatlo ka tawo sa Negros Oriental sang 2019.
Siya kag ang 11 ka iban pa ang gin-designar anay sang Anti-Terrorism Council nga “terorista” sadtong Agusto 2023 bangud sa ginaalegar nga pagpangpatay kag harassment sa Negros Oriental.
Ginsipa man ini halin sa Kamara sang Agusto sang amo man nga tuig bangud sa disorderly conduct kag padayon nga pag-absent sa trabaho sa Kongreso apisar sang iya nga expired travel authority.
Sa tanan ini nga hitabo, sulit-sulit nga nagpanindugan si Teves nga wala siya sang kaangtanan sa tanan nga alegasyon batok sa iya.#
