Amat-amat na nga nagaayo ang pamatyag ni President Ferdinand “Bongbong” Marcos Jr. kag padayon subong nga naga-trabaho samtang naka-isolate kag nagahatag sang mandu sa myembro sang iya nga Gabinete.
Sang Byernes sang nangin reactive sa Covid-19 antigen test ang presidente kag sang ginpaidalom sa confirmatory RT-PCR test, nagpositibo ini sa Covid-19.
Ini na ang ikaduha nga tion nga na-infect ini sang virus. Una na ini nga nag-positibo sa Covid-19 sang 2020.
Suno kay Press Secretary Rose Beatrix “Trixie” Cruz-Angeles, sandig sa pahayag sang lead physician nga si Dr. Samuel Zacate, wala nadulaan si Marcos sang iya nga panabor amo man sang sense of smell, kag wala man ini sang hilanat.
Gin-abisuhan ang presidente nga magpaidalom sa home isolation sa sulod sang pito ka adlaw bilang pagsunod sa Department of Health protocol para sa fully-vaccinated individuals.
Ginpahayag man ni Angeles nga posible i-subject si Marcos sa dugang nga laboratory examination kag padayon man subong ang close monitoring tubtub nga matapos ang home isolation period.
Sang nagligad nga semana, nagmandu si Marcos sa local government units nga i-reinstate ang vaccination batok sa Covid-19.
Ginmanduan man sini ang LGUs nga dasigon ang inoculation programs ilabi na ang paghatag sang booster shots.
Importante ang booster shots suno kay Marcos para sa pagbukas sang ekonomiya.
