Ginpasalamatan ni President Ferdinand Marcos Jr. ang Kamara sa maayo nga trabaho — pagduso kag pagpasar sang mga hagna nga maayo para sa pag-umwad sang ekonomiya.
Kaundan ini sang mensahe sang presidente sa plenaryo sa Kamara antes gin-adjourn ang session kahapon, Mayo 31.
Suno kay Marcos, importante ang maayo nga partnership sa tunga sang legislative kag executive. Ginhingyo man sini ang Kamara nga magpabilin nga nagahugpong ukon united.
“Remain united, determined, and passionate. Be the voice of the people and fulfill your duties as servant leaders in your respective districts and provinces,” kabahin sang mensahe ni Marcos Jr.
Pareho nga gin-adjourn sang Senado kag Kamara ang ila nga una nga regular session kahapon matapos naaprubahan ang priority measures kaangay sang kontrobersyal nga Maharlika Investment Fund bill nga isa ka pirma na lang sang presidente ang kihanglan agud dalayon na nga mangin layi.
Gindayaw man ni House Speaker Ferdinand Martin Romualdez ang mga mamalidha bangud sa 9,600 measures nga gin-file, kag pagpasar sang 33 sa 42 ka mga hagna nga ginkonsiderar nga priority legislation sang Legislative-Executive Development Advisory Council.
Lakip sa ginakabig nga accomplishments suno kay Romualdez amo ang labing-una nga layi nga ginpirmahan sang presidente nga amo ang Subscriber Identity Module (SIM) Card Registration Act.
Wala man sini ginkalimtan ang mensahe sang “unity” sa tunga sang drama sa Kamara.
“I must also emphasize the importance of unity and cooperation among all our political parties. Pursuant to our shared vision of a strong republic, leaders of major political parties in this august halls have expressed their unwavering commitment to work together for the passage of the pro-people legislative agenda of President Marcos (Jr),” pahayag sang house speaker.
Maga-balik ang session sa Hulyo 24 para naman sa pag-umpisa sang second regular session. Maga-convene ang House kag Senate sa aga sang Hulyo 24, kag ideliver naman ni Marcos ang iya ikaduha nga State of the Nation Address kadungan sang joint session sang Kongreso pagkahapon. #
