Nagalagas sa tyempo ang masobra isa ka milyon ka mga residente sa northern Gaza Strip agud makabakwit insigida pa-nabagatnan sa sulod sang 24 ka oras.
Ini matapos nagpaulan sang leaflets ang Israeli military kag naghatag sang paandam nga indi dapat magbalik ang mga residente sa ila balay tubtub nga wala pa sang abiso halin sa Israel Defense Forces.
May paandam man nga dapat wala sang magtinir pati sa public shelters sa Gaza City.
Dugang pa nga warning, posible nga mapatay ang bisan sin-o man sa Gaza nga magpalapit sa security fence nga amo ang naga-separar sa amo nga area sa Israel.
Suno kay Israeli Defense Minister Yoav Gallant, naga-impon ang Hamas militants sa mga sibilyan sa Gaza gani dapat sila nga i-separar gilayon.
Photo: Hatem Ali/AP
Agud maluwas suno sa Israeli military, dapat nga magkadto sa direksyon pa-nabagatnan bangud gub-on sang Israel ang kuta sang Hamas — lakip dira ang tanan nga imprastraktura, headquarters, kag militar sang amo nga militante nga grupo.
Sa rekord sang United Nations, yara sa 1.1 milyon ka mga tawo ang nagapuyo sa northern Gaza.
Ang mensahe sang Israel military ang ginbasa man ni Lt. Col. Jonathan Conricus, international spokesperson sang Israel Defense Forces, agud mapahibalo sa United Nations.
Naghatag naman sang national address si Israeli Prime Minister Benjamin Netanyahu nga panason sini ang Hamas samtang nga naga-preparar na subong ang militar sang Israel sang ground invasion sa Gaza Strip.
Gin-deliver ang amo nga address Byernes sang kagab-ihon oras sa Israel ukon pila ka oras lang gid ang nagligad kun basehan ang oras diri sa Pilipinas.
Naghingyo naman ang United Nations sa Israel nga bawion ang ila mandu nga magbakwit ang mga residente sa sulod lang sang 24 ka oras bangud imposible ini nga matabo samtang padayon ang airstrikes.
Gin-report sang media office sang Hamas nga samtang nagapalalagyo ang mga tawo padulong sa nabagatnan, nagasige man ang pagpamomba sang warplanes sa mga salakyan kag as of press time, 70 na ang nagkalamatay.
May reports nga nagmandu man ang Hamas militants sa mga Palestinians nga magtinir sa ila balay — baliskad sa mandu sang Israeli military.
Nahibaluan nga sa pagtimalos sang Israel bangud sa pagpang-atake sang Hamas militans, 1,537 na ka Gaza residents ang napatay lakip na ang 500 ka kabataan.
May 6,600 man nga nasamaran suno pa sa Gaza Health Ministry. #
