ILOILO CITY- Masobra na sa 50 ka kandidato sa Iloilo City kag Iloilo Province ang gindagdagan sang show cause order sang Commission on Elections may kaangtanan sa nagahilapit nga Barangay and Sangguniang Kabataan Elections.
Sa interview sang Bombo Radyo kay Atty. Reiner Layson, Provincial Election Supervisor and concurrent City Election Officer sang Commission on Elections- Iloilo, iya ginpahayag nga kalabanan sa gindagdagan sang amo nga order ang mga kandidato nga nagapatigayon sang premature campaigning nga isa ka election offense.
Base sa Omnibus Election Code, ang sin-o man nga mapamatud-an nga nagapatigayon sang premature campaigning ang mahimo nga mapreso sang isa tubtob anum ka tuig, pagkakas sang kinamatarong nga makaboto kag disqualification sa pagkapot sang public posts.
Suno kay Layson, ini ang patimaan sang involvment sang publiko sa pagbantay kag sa pag-report sa mga kandidato nga nagalapas sa layi.
Nagpaandam naman ini sa mga kandidato angot sa pagsugod sang campaign period sa Oktubre 19 nga magalawig tubtob sa Oktubre 28 nga indi gid manghatag sang mga butang nga may balor bangud makabig ini nga votebuying nga isa man ka election offense.
