Nagsaka na sa 73 ang numero sang mga bangkay nga nakutkutan sa mass graves sa kagulangan sa eastern Kenya kun sa diin ang mga biktima ang ginapahayag nga mga sumulunod sang isa ka kulto nga ginpapati nga makakadto sila sa langit kun sila ang magpagutom.
Ginakahangaw-an man nga labi pa nga magsaka ang numero sang patay. Ini bangud kun basehan ang Kenyan Red Cross, 112 ka mga tawo ang gin-report nga nadula base sa reklamo nga nabaton sa tracing kag counseling desk nga ginbutang sa isa ka local hospital.
Nahamtang ang amo nga mass graves sa sulod sang Shakahola forest sa Malindi kun sa diin nagapuyo man ang mga sumulunod sang self-proclaimed Good News International Church.
Suno kay Kenya Inspector General of Police Japhet Koome, may yara na sang 29 ka survivors nga na-rescue kag padayon pa subong ang operasyon agud mabuligan ang iban pa nga posible nakaluwas nga mga biktima.
May pathologists man nga magakuha sang DNA samples kag maga-conduct sang tests agud matumod kun napatay ang mga biktima bangud sa pagpagutom.
Abril 14 sang gin-aresto ang church leader nga si Paul Mackenzie nga gin-alegar nagsugo sa mga biktima nga magpagutom agud makakit-anay sila ni Hesus.
Gin-alegar man nga ginpangalanan sini ang tatlo ka areas bilang Nazareth, Bethlehem kag Judea kag gin-bawtismuhan ang followers antes ginpa-puasa.
Una na nga nagpanginwala si Mackenzie sa amo nga sala kag ginsiling nga ginsirado na ang amo nga simbahan sang 2019. Apisar nagpanginwala, wala ini gintugutan nga maka-pyansa.
Ginpahayag naman ni Kenyan interior minister Kithure Kindiki nga ginkordon na amo ang amo nga area sa kagulangan kag gin-deklarar nga isa ka crime scene.
Nahibaluan nga isa ka religious country ang Kenya apang may mga pinasahi nga kaso sang mga tawo nga napasulod sa delikado kag wala na-regulate nga mga simbahan kag kulto.
