Nagdangat sa 81 ka mga pamilya ang apektado sang buhawi nga naglaslas sa pila ka areas sang syudad sang Iloilo kagab-i, Agusto 8.
Sandig sa pinakaulihi nga report sang Iloilo City Government, 54 ka pamilya ang halin sa Cubay, Jaro; 20 sa Benedicto, Jaro; anum sa Balabago, Jaro; kag isa sa Gustilo, La Paz.
Sa amo nga initial report, 52 ang na-damage nga mga balay kun sa diin 48 gid ang yara sa Barangay Cubay.
Sa amo nga mga insidente, may nakakas kag naglupad nga mga atop, may mga naghapa nga porsyon sang balay, kag may natumbahan sang puno sang kahoy.
Subject pa ini sa validation kag verification sang City Social Welfare and Development Office (CSWDO), gani posible pa nga magbag-o ang numero.
Sa interview naman sang Bombo Radyo kay Joy Fantilaga-Gorzal, spokesperson ni Mayor Raisa Treñas, iya ginpahayag nga gin-activate gilayon ang mga evacuation center.
Ginhatagan sang local government unit sang matulugan, hygiene kits, kag pagkaon paagi sa Community Kitchen ang mga pamilya nga nagub-an sang balay.
Ginpasiguro man nga mahatagan sang prayoridad ang clearing operations ilabi na sa Jaro Plaza kun sa diin may nagkalatumba nga kahoy, kag naglalapta ang debris kag mga sanga.
Sandig man sa latest assessment, may 12 ka reported incidents sang nagkalatumba nga mga kahoy, electrical posts kag debris sa pila ka areas sang Jaro kag Mandurriao.
