ILOILO CITY – Nataban sang duha ka mga suspek ang masobra P1.5M nga kwarta nagikan sa empleyado sang isa ka hardware store nga nahamtang sa banwa sang Calinog, Iloilo.
Ang insidente natabo sa Brgy. Agdahon, Passi City.
Sa interview sang Bombo Radyo kay Pol. Lt. Col. Dennis Pamonag, hepe sang Passi City Police Station, iya ginpahayag nga naglab-ot sa P1, 560, 200 ang unod sang bag nga dala sang mga biktima agud kuntani nga magdeposito sa isa ka bangko sa nasambit nga syudad.
Suno kay Pamonag, nagasakay sa motor ang duha ka biktima sang ginsundan sang duha man ka suspek nga nagasakay sa motor kag sang yara na sa Brgy. Agdahon, ginbangga-an sang mga suspek ang mga biktima, gintaya-an sang armas kag nagdeklarar sang hold up.
Gilayon nga nagpalagyo ang mga suspek padulong sa direksyon sang Brgy. Poblacion, Passi City.
Nakasuksok sang helmet kag itom nga panapton ang duha ka suspek.
Pahayag dugang ni Pamonag, may yara na sila sang nasundan nga persons of interest sa natabo nga robbery hod up.
Posible suno kay Pamonag nga sa banwa pa lamang sang Calinog, ginasundan na sang mga suspek ang mga biktima.
