TUBUNGAN, ILOILO – Nadulaan sang kwarta kag iban pa nga kagamitan ang ginluthang-patay nga barangay kagawad sa Barangay Mayang, Tubungan, Iloilo.
Sa interview sang Bombo Radyo kay Nena Delia Tablazon, iloy sang 33 anyos nga biktima nga si Harold Tablazon, iya ginpahayag nga sang nakit-an ang bangkay sang iya anak, wala na ang duha ka cellphone sini, kwarta nga nagdangat sa masobra P30,000, bag, kag wallet.
Wala sang ihibalo si si Tablazon kun sin-o ang nagkuha sang kagamitan sang iya anak.
Palaligban man para sa natungdan bangud ang iya lang anak ang ginkawatan samtang yara naman ang gamit sang isa pa ka biktima nga si SK Chairman Glenn Bunda.
Samtang suno naman kay Pol. Lt. Jose Rommel Samson, hepe sang Tubungan Municipal Police Station, masobra lang sa P100 ang kwarta nga yara sa bulsa sang biktima sang naabtan nila ini sa crime scene.
Paathag sang natungdan, indi pa maestablisyar kun ginkawatan ang biktima bangud nagapadayon pa subong ang imbestigasyon.
Wala man sang mahatag nga statement si Samson may kaangtanan sa pahayag sang Philippine Army nga posible New People’s Army (NPA) ang nagpatay kay Tablazon agud pahipuson na lang ini sa iya nahibaluan bangud ginapahayag nga nangin miyembro man ini sang rebelde nga grupo apang nagsungka na sa otoridad sang tinalikdan nga Mayo.
Suno kay Samson, sa subong, iga-rekomenda niya ang pagtukod sang special investigation task group agud matutukan pa ang imbestigasyon sa amo nga krimen.
