Kun kaisa, daw ginahimo na man lang naton nga kaladlawan ang mga adlaw nga nagasundanay kita sang sabat sa eskwelahan. Ara bala nga wala ikaw nakatuon ukon wala ka nagapamati kag pasalamat ka nalang sa imo nga seatmate kun mabuot ini kag kun may ihatag nga sabat sa imo sa test!
Apang syempre, indi gid maayo ang cheating kag indi ini dapat pag-i-tolerar.
Sa India, nabutang sa sentro sang kontrobersiya ang isa ka eskwelahan matapos nakuhaan sang video ang mga tawo nga nagatalaklas sa pader agud lamang mapasahan sang sabat ang mga nagakuha sang exam sa sulod.
Sandig sa reports, natabo ini sa Chandravati School sa Tauru sa Nuh district sa amo nga pungsod.
Ginpahayag nga pila lang ka ginutlo ang makaligad sang nag-umpisa ang exam, may nag-leak sang examination paper — rason kun ngaa naghulag gilayon ang mga ginikanan kag mga himata sa guwa sang eskwelahan, gin-search ang mga sabat, kag sang ulihi, nagtaklas ang mga ini sa pader agud nga maduhulan sang sabat ang mga examinees.
Todo-panindugan naman ang principal sang buluthuan nga wala sang cheating scandal nga natabo bangud sa ila seguridad nga ginpatuman. Ang video suno sa iya ang nagapakita lang sa tuyo nga mag-cheat, apang wala ini nadayon bangud may mga police sila nga nagapatrolya sa area kag naka-estasyon sa kada corner sang campus kun may mga kaangay sini nga board exams.
Apisar sang depensa sang eskwelahan, may pila naman nga nagpahayag nga daw nahimo na nga routine ang cheating sa amo nga eskwelahan, kag sa pagkamatuod suno sa ila, daw para lamang sa “formality” ang security sa tion sang importante nga pasinawan.
Suno sa district education officer, nagmandu na siya sa officials nga magpasa sang report kaangot sa amo nga insidente.
Gindugang naman sang Block Education Officer nga wala ginatugutan ang cheating sa bisan anuman nga sirkumstansya kag dapat nga manabat pananglitan matuod nga may yara gid man sang involved diri samtang padayon ang exam.
