ILOILO CITY – Nakit-an sang Philippine Institute of Volcanology and Seismology ang mahinay nga flow sang lava nagikan sa baba sang Mayon Volcano sa ika-siyam nga gab-i.
Suno sa ahensya, ini ang nagresulta sa pagdamo man sang rockfall kag pyroclastic density current activity.
Ginpakigbahin man sang ahensya ang time-relapse video nga nagapakita sang pyroclastic density current event nga na-generate sang lava dome collapse sa baba sang bulkan.
Ini na ang pinakadako nga na-record humalin sang una ini nga nagtuhaw sang Hunyo 8.
Una na nga naka-record ang ahensya sang duha ka volcanic earthquakes kag 306 ka mga rockfall events sa Mayon Volcano sa Albay nga nagapabilin sa Alert Level 3.
Ang ini nga mga aktibidad ang mas manubo sa pito ka mga volcanic earthquakes kag 309 ka mga rockfall events nga na-record sang nagligad nga adlaw.
Ginpagwa man sang bulkan ang 193 tons sang sulfur dioxide sang Hunyo 14.
Nagpahanumdom naman ang Philippine Institute of Volcanology and Seismology sa publiko nga maglikaw sa six-kilometer radius sang Permanent Danger Zone.
