ILOILO CITY- Handa nga magkooperar sa United States Government ang pamilya ni Mina, Iloilo Mayor Lydia Grabato matapos nga nalakip ang iya anak sa ginpasakaan sang panumbungon sang Securities and Exchange Commission sang Estados Unidos.
Ini amo si Rey Grabato nga ginaalegar nga involved sa pag-operate sang $600-million ukon P35 billion Ponzi-like property scam nga nagbiktima sa linibo ka investors kalakip na ang ginatos ka retirees sa Estados Unidos.
Sa interview sang Bombo Radyo kay Mayor Lydia Grabato, iya ginpahayag nga sa subong, ginahulat na lang nila ang tikang sang gobyerno sang Estados Unidos natuhoy sa kaso agud nga madepensahan man sang iya anak ang iya kaugalingon.
Suno kay Mayor Grabato, ang iya anak ang yara subong sa Mina, Iloilo bangud nga nagpauli ini sang tinalikdan nga Mayo 8, 2022 kasunod sang iya pag-resign sa iya trabaho sa Estados Unidos matapos nga naaksidente ini kag gindeklarar sang iya kompaniya bilang incapacitated.
Nahibaluan nga sa complaint sang Securities and Exchange Commission sa Estados Unidos, ang kaso ang ginpasaka batok sa New Jersey-based luxury property firm National Realty Investment Advisors LLC kag sa former executives nga sanday Rey Grabato II, Daniel Coley O’Brien, Thomas Nicholas Salzano, kag Arthur Scutaro.
Ang Ponzi scheme isa ka sahi sang scam nga naga-generate sang “returns” gamit ang kwarta nga nakolekta sa bag-o nga investors sa baylo nga lehitimo nga investment activity.
Gina-akusahan man ang kompaniya nga nagagamit sang kwarta sang investors agud gastuhan ang personal nga luxury purchases sang pamilya sang executive kag magbayad sa reputation management firm agud ganyaton ang mga investors.
Ginaalegar man nga ang firm ang nagmanipula sang financial documents kag iban nga marketing materials nga ginapakita sa investors agud maghimo sang peke nga appearance nga ang firm isa ka madinalag-on nga business venture.
Ang nasambit nga complaint sang SEC ang gin-file sa federal court sa district of New Jersey.
