ILOILO CITY- Indi magtambong si Iloilo City Mayor Jerry Treñas sa patigayunon nga congressional investigation sa Enero 11, Huwebes, nahanungod sa natabo nga power blackout sa Western Visayas sang damlag lang.
Sa interview sang Bombo Radyo kay Iloilo City Mayor Jerry Treñas, iya ginpahayag nga napadal-an siya sang notice sa amo nga imbestigasyon apang ang mga gobernador lamang sang apektado nga mga probinsya ang gin-imbitar agud mangin resource speakers.
Suno kay Treñas, si Governor Arthur Defensor na lamang ang magapautwas may kaangtanan sa tuman ka dako nga damage sa syudad nga ginabanta P2 billion pesos bangud sa blackout kag kun paano ini i-address.
May kaangtanan naman sa indi pag-imbitar sa alkalde agud mangin resource person sa amo nga congressional investigation, ginpahayag sang natungdan nga posible nga nagkonsulta ang mga kongresista sa National Grid Corporation of the Philippines kun sin-o nga opisyal lang sa Western Visayas ang hatagan sang tsansa nga maghambal.
Matandaan nga nagbuya sang mga tinaga si Treñas batok kay National Grid Corporation of the Philippines President and Chief Executive Officer Anthony Almeda nga gintawag sang alkalde nga lain-ulo bangud sa pagtanyag ni Almeda sang Jollibee kag lechon agud ipadala sa alkalde sa tunga sang naeksperyensiyahan nga power blackout
Samtang, magatambong naman si Treñas sa patigayunon nga separado nga inquiry in aid of legislation sang Senado angot sa blackout.
Suno sa alkalde, imbitado siya bilang resource person sa amo nga senate inquiry nga hiwaton sa Enero 10, Mierkules, apang magatambong ini via zoom.
