Gin-athag ni Iloilo City Mayor Jerry Treñas nga wala ini nagapamatok sa ginapatigayon nga pay-out para sa mga indigent students nga ginapatigayon sang Department of Social Welfare and Development (DSWD).
Ini kasunod sang pagkadismaya sini sa nangin sitwasyon sa Iloilo Sports Complex sang nagdinaguso ang linibo ka ginikanan kag estudyante halin sa syudad kag probinsya sang Iloilo agud mag-avail sang cash aid.
Sa interview sang Bombo Radyo kay Mayor Treñas, iya ginpahayag nga kuntani ginhatagan sang DSWD sang dignidad ang mga kabataan nga makuha sang educational assistance.
Suno sa alkalde, ang natabo sang Sabado ang kaangay lang nga ginhaboy sang DSWD ang kwarta sa hangin kag ginpaagawan.
Dugang sang alkalde, kun wala gid man sang salig ang DSWD sa LGUs, mas maayo nga ipaagi na lang nila sa mga eskwelahan kag sila man ang mag-verify sang mga benepisyaryo.
Wala man napunggan sang alkalde nga mamuyayaw bangud nga kun eleksyon, halos maghakos sa mga tawo sa Iloilo City ang mga matag-as nga opisyal sang mga ahensya sang gobyerno, apang subong, kaangay nga wala sang gana nga makig-angot sa LGU.
Nahibaluan nga ginkadismaya sang alkalde nga wala gid sang koordinasyon sa iya kag sa iban nga LGUs ang distribution sang cash aid sang DSWD.
