ILOILO CITY – Nagalaum si Iloilo City Mayor Jerry Treñas nga masarangan sa sulod sang 60 ka adlaw ang pagpatuman sang Oplan Hawan sa syudad sang Iloilo.
Ini matapos nga ginsapol ni Treñas ang Public Safety and Transportation Management Office, Trask Force Anti-Squatting and Illegal Structures Unit kag ang Office of Barangay Affairs tuhoy sa pagpatuman sang Oplan Hawan.
Sa interview sang Bombo Radyo kay Treñas, iya ginpahayag nga iya ginpahanumdom ang nasambit nga mga talatapan nga amo ang nagapatigayon sang Oplan Hawan.
Magluwas sa paghimakas sang Iloilo City Government, ginpahayag ni Treñas nga importante nga magbulig ang pumuluyo.
Kadungan sini, ginpahayag ni Treñas nga 28 ka motorisklo ang igahatag sang Iloilo City Government sa Philippine National Police samtang 18 naman Transportation Management and Traffic Regulation Office.
Ang kwarta nga pagagamiton sa pagbakal sang mga motorsiklo ang gikan sa savings sang Iloilo City Government gikan sa wala madayon nga overpriced purchase order sa pagbakal kun tani sang salakyan.
Samtang, substantial ukon bastante ang 60 ka adlaw agud makuha ang tanan nga obsturctions sa dalanon sa syudad sang Iloilo.
Sa interview sang Bombo Radyo kay Fernando Jose ‘Boyet’ Rico, Executive Assistant for Barangay Affairs, iya ginpahayag nga nagapadayon ang Oplan Hawan sa diin amat-amat na nga nga napangkuha ang mga obstruction sa dalan.
Suno kay Rico, ang iban sa permanent structures kasubong sang barangay hall ukon tanod outpost ang amat-amat na nga napangguba.
Ginpahayag ni Rico nga ang mga tag-iya sang balaligyaan nga yara sa higad sang dalan ang kinahanglan nga maghalin.
Sa pagpatigayon sang Oplan Hawan, ginpahayag sang natungdan nga wala sang pasin-uhon kag wala sang paboranay nga matabo.
