ILOILO CITY- Ginsabat ni Iloilo City Mayor Jerry Treñas ang pagpanghangkat ni Councilor Plaridel Nava nga ipagwa ang listahan sang mga pangalan sang job hires nga nagpositibo sa paggamit sang druga kasunod sang ginpatigayon nga drug test sa City Hall.
Sa interview sang Bombo Radyo kay Mayor Trenas, iya ginpahayag nga indi niya luyag nga ibutang sa risgo ang kabuhi sang nasambit nga mga job hires bangud posible nga i-subject ang mga ini sa Extra Judicial Killings.
Suno sa alkalde, kun luyag gid man ni Nava nga makita ang pangalan sang amo nga job hires, mas maayo nga magpadulong na lang ini sa opisina ni City Administrator Melchor Tan agud malantaw ang listahan.
Una na ginaduso ni Nava nga ipagwa ang pangalan sang jobhires nga durg positive agud pamatud-an nga seryoso ang administrasyon ni Trenas sa kampanya batok sa illegal drugs.
