Isa ka man bala sa napa-singgit kag naadik sa South Korean coming-of-age zombie television series nga All of Us Are Dead?
Ini ang nangin top one most viewed content sa Netflix nga gin-istoryahan gid sang kadam-an sa bilog nga kalibutan kag ini nga 12-episode series ang nag-land man sa Top 10 list sa 91 ka mga pungsod lakip na ang Pilipinas halin sang premiere sini sang Enero 28.
Pat-od nga mapa-‘Sana all ka’ bangud isa sa cast members sa sini nga serye ang tumandok sang Sitio Pamumbungan, Barangay Milibili, Roxas City, Capiz.
Ini amo si Noreen Joyce Guerra, 30, nga naga-trabaho man bilang isa ka manager sa isa ka financial company sa Seoul, Korea.
Antes ang acting career sa South Korea, nag-graduate si Guerra sa University of the Philippines Visayas (UPV) – Iloilo kag nagtuon man sa Korean Cultural Center in the Philippines. Paagi sa na-earn nga scholarship, nag-proceed ini sa South Korea para sa iya nga master’s degree sa Business Administration Major in Marketing.
Bangud sa iya anay nga mga koneksyon sa industry sang diri pa sa Korean Cultural Center sa Pilipinas, nangin paagi ini agud nga makatrabaho man siya sa fashion show events, movies, kag drama awards sa South Korea apang sang amo nga tion, yara pa lang siya sa likod sang stage.
Sang ulihi, nahatagan sang kahigayunan si Guerra nga maka-act sa atubang sang camera, kag bangud man sa iya skills sa Korean roles ilabi na sa pang-high school nga mga roles, nangin sunod-sunod na ang iya nga mga nasudlan nga proyekto.
Sa anum ka tuig nga pagtinir sa South Korea, nangin kabahin na si Guerra sang 85 ka Korean dramas, 5 ka movies, kag kapin 10 ka commercials.
Sa exclusive interview sang Bombo Radyo Iloilo kay Guerra, iya ginpahayag nga hobby lang niya ang acting gani nga ginahimo lang niya ini sa weekends ukon sa holidays bangud mas nakatutok siya gihapon sa iya trabaho bilang isa ka manager sa isa ka financial company.
Indi man basta-basta ang nangin kaupod sini sa mga proyekto bangud lakip diri ang pila ka mga aktor kag aktres nga nagapakilig sa Filipino fans: sanday
Lee-Min Ho, Park Bo-gum, Hyun Bin, aktres nga si Song Hye-kyo, kag aktres nga si Kim Tae-hee.
Tuman naman ang pagpasalamat ni Guerra sa mga Ilonggo nga nagsuporta gid sa ila nga hit Korean zombie series.
Nagalaum man ini nga padayon nga suportahan ang iban pa nga mga proyekto sa South Korea. Kabahin si Guerra sang isa pa ka South Korean movie nga natalana naman nga ipa-guwa sa bulan sang Abril subong nga tuig. ##
