ILOILO CITY – Ginareklamo sang mga pumuluyo sang Brgy. Calaya, Nueva Valencia, Guimaras ang pagpablik sa ila sang nabaton nila nga ayuda gikan sa Social Amelioration Program sang Department of Social and Welfare and Development.
Sa interview sang Bombo Radyo kay Jirroful Galvez, ang tagreklamo iya ginpahayag nga ginapabalik sa ila sang Municipal Social Welfare and Development Office sang Nueva Valencia ang ayuda nga ila nabaton bangud ginapahayag miyembro na sila sang Pantawid Pamilyang Pilipino Program (4PS) kag makabig man sila nga family rooster.
Suno kay Galvez, ginaproblemahan nila subong kun paano nila mabalik ang kwarta bangud nagasto na nila ini.
Dugang sang natungdan, kinahanglan nila nga manghulam naman sang kwarta agud mabalik lang ang nasambit nga ayuda.
Ginpahayag ni Galvez nga ginpaandaman pa sila sang Municipal Social Welfare and Development Office nga pasakaan sila sang kaso sa tion nga indi nila ini mabalik.
