Nagpwesto na kagab-i ang mga bolantero halin sa nagkalain-lain nga banwa sa Probinsya sang Iloilo sa bahin sang Aldeguer Street sa guwa sang Iloilo Central Market.
Sa interview sang Bombo Radyo kay Wilson Alea, isa ka bolantero, iya ginpahayag nga madamo sang nagpwesto kag nagplastar sang ila mga baligya sa market day nila kahapon nga adlaw nga nag-umpisa alas 6 sang gab-i tubtob alas 5 sang kaagahon kaina.
Suno pa sa iya nga ang ila sistema sa karon nakabulig gid sa ila pangabuhian kag nagapasalamat ini bangud ginhatagan na sila sang ila maplastaran sang ila baligya sa Pacifica area agud indi na magtalang-talang ang ila mga customers
Ginklaro man sini nga wala sang nagasulsol sa ila bangud palangabuhian na nila ang pagbaligya sang malawig na nga tinuig.
Nahibaluan nga nagpagwa sang schedule ang Iloilo City Government para sa market day sa syudad kun sa diin kada Lunesan may ara sang nagalatag sa Central Market nga naga-umpisa sang (6:00 PM) tubtob Martes (5:00 AM)
Samtang sa Iloilo Terminal Market, Martes (6:00 PM) tubtob Miyerkules (5:00 AM), sa Jaro Big Market, adlaw sang Miyerkules (12:00 NN) – Huwebes (12:00 NN), sa Mandurriao Market, Biyernes (6:00 PM) tubtob Sabado (5:00 AM), La Paz Market adlaw sang Sabado (6:00 PM) tubtob Domingo (12:00 NN) kag sa Arevalo Market, adlaw sang Domingo (12:00 NN) tubtob 7:00 PM.
