Iloilo City – Nagapadayon ang Iloilo City Health Office sang health screening sa mga empleyado sang Iloilo City Hall.
Sa interview sang Bombo Radyo kay Dr. Jay Fortuna, Medical Officer IV sang Iloilo City Health Office, iya ginpahayag nga ang ini nga hilikuton ang nagatuyo nga mahatagan sang pag-ulikid ang mga empleyado nga nagaserbisyo sa syudad.
Suno kay Fortuna, ang ini pamaagi ang isa sa mga palaagyan agud mahibaluan ang family history sang empleyado kun may yara ini sang balatian nga wala pa na-diagnose kaangay sang hypertension kag diabetes.
Ginpahayag sang natungdan, ang ini nga aktibidad ang nag-umpisa sang nagligad pa nga tuig sang 2022 kun sa diin natapos na libot ang mga empleyado sa 5th, 6th kag 7th floor sang Iloilo City Hall.
Sa subong, ini ang masami nga ginpadayon sa 4th floor kag padalom, magabalik ini liwat sa 7th floor ilabi na sa mga empleyado nga wala nagapaidalom sa health screening.
Nahibaluan nga nagahatag man ang amo nga opisina sang bulong kag maintenance sang mga empleyado.
