ILOILO CITY – Temporaryo nga gindumilian sang Panay Energy Development Corporation (PEDC) nga magreport sa duty ang ila mga empleyado nga nagapuyo sa Brgy. Ingore, La Paz, Iloilo City.
Ini matapos nagpositibo sa COVID-19 rapid test ang isa ka returning resident sang nasambit nga barangay.
Sa interview sang Bombo Radyo kay Engr. Nilo Madrid, first vice president sang Panay Energy Development Corporation, iya ginpahayag nga hulaton lang anay ang resulta sang reverse transcription polymerase chain reaction (RT-PCR) test para sa kumpirmasyon.
Nagahalong lang ang pamunuan suno sa natungdan kag sa subong gina-abisuhan ang mga empleyado nga mag-obserba sang minimum health standard protocols kaagay sang pagsuksok sang face mask, pagdisinfect kag pagsunod sang physical distancing.
Sa tion nga magnegatibo sa COVID-19 confirmatory test ang amo nga returning resident, pahanugutan naman ang mga empleyado nga taga-Ingore nga magbalik sa trabaho.
Ginpasalig man sang natungdan nga wala sang power interruption kag indi sini maapektuhan ang bug-os nga operasyon sang pamunuan bangud may yara sila sang nahanda nga pagbahin-bahin sang mga empleyado kun matabo ang kaangay nga insidente.
