KUWAIT – Nagakahangawa ang mga employer sang pipila ka mga Overseas Filipino Workers (OFWs) sa Kuwait sa posibilidad sang total nga pag-ban liwat sang Pilipinas sang deployment sang Filipino workers sa amo nga pungsod.
Sa interview sang Bombo Radyo kay Ma. Theresa Navarro, tumandok sang Maasin, Iloilo kag isa ka domestic helper nga isa na ka tuig nga naga-obra sa Kuwait, iya ginpahayag nga nagpanic man ang iya mga amo sa balita sang pagkapatay sang isa ka OFW sa ila lugar.
Kaangot sa kamatayon ni Jeanelyn Villavende sang Norala, South Cotabato nga ginpahayag ginpatay sang iya employer, ginakahangaw-an sang mga amo ni Navarro nga paulion na ang tanan nga Filipino workers balik sa Pilipinas.
Suno kay Navarro, pito ang Pinay nga nagatrabaho sa pamilya sang iya nga mga employers amo nga mabudlayan gid ang mga ini kun magdeklara ang otoridad sa Pilipinas sang total ban.
Dugang pa ni Navarro, sa iya bahin, indi man mabudlay ang iya trabaho ilabi na bangud mabuot man ang iya mga amo.
Samtang, sa interview sang Bombo Radyo kay Anne Escalona, tumandok sang Buga, Igbaras kag apat na ka tuig nga nagatrabaho sa Kuwait, iya ginpahayag nga wala man sila sang mahimo kun ideklara ang ban sang deployment sang Filipino workers sa Kuwait.
Apang, pahayag ni Escalona, yara sila sa nasambit nga pungsod agud magpangita sang kinawala.
Maayo man suno kay Escalona ang iya mga employers kag ginasaligan siya sini sang mga ulubrahon bisan diin man sila magkadto.
Dugang pa sang natungdan, ginkasubo man niya kag sang iya mga kaupod nga Pilipina sa Kuwait ang kamatayon ni Villavende bangud apisar indi ini halin sa Iloilo, ginakabig nila ini nga ‘kalahi’ sa luwas sang pungsod.
